Shoferi i dyshuar i një kamioni ku 53 emigrantë vdiqën nga nxehtësia në Teksas nuk e dinte që kondicioneri kishte pushuar së punuari, thonë dokumentet e gjykatës. Homero Zamorano, 45 vjeç, u gjet i fshehur pranë kamionit të hënën dhe është një nga katër personat e akuzuar.
Ky është incidenti më vdekjeprurës i trafikimit të qenieve njerëzore në historinë e SHBA. Viktimat ishin nga Meksika, Hondurasi, El Salvadori dhe Guatemala, ndërsa disa fëmijë të gjetur në automjet janë ende duke u trajtuar në spital.
Shoferi Zamorano u gjet i fshehur në shkurre dhe zyrtarët meksikanë thonë se ai fillimisht u përpoq të shtirej si një nga të mbijetuarit. Ai u arrestua kur pamjet e kamerave treguan se po ngiste kamionin duke kaluar një pikë kontrolli të Patrullës Kufitare të SHBA në Laredo, Teksas.
“Shoferi nuk ishte në dijeni se njësia e ajrit të kondicionuar ndaloi së punuari dhe ishte arsyeja pse njerëzit vdiqën”, thuhet në dosjen e Gjykatës për 45 vjeçarin Homero Zamorano. Viktimat përfshijnë 27 qytetarë meksikanë, si dhe 14 honduranë, shtatë guatemalanë dhe dy salvadoranë.
