FRANCË- Situata e protestave kundër reformës së pensioneve në Francë ka dalë sërish jashtë kontrollit. Mediat e huaja raportojnë se mijëra njerëz kanë protestuar sot në Paris dhe disa qytetet të tjera në Ditën e Punës.
Njerëzit filluan të mblidhen në qytetet e Nantes, Lionit, Marsejës dhe Strasburgut dhe një tubim filloi pasdite në Paris. Policia arrestoi 30 persona para dhe gjatë marshimit në Paris dhe përdori gaz lotsjellës ndaj protestuesve.
Më herët Le Figaro tha se Ministria e Brendshme franceze do të vendosë 12,000 policë në të gjithë vendin, duke përfshirë 5,000 në Paris, pasi autoritetet prisnin deri në 650,000 protestues në 380 mitingje në një ditë të vetme. Ministri i Brendshëm Gerald Darmanin shprehu gjithashtu mbështetjen për përdorimin e dronëve për vëzhgim në një mesazh me tekst dërguar autoriteteve lokale.
Një e treta e fluturimeve u anuluan në aeroportet Paris-Orly, Marseille, Lyon, Bordeaux, Nantes dhe Toulouse, ndërsa 25% u anuluan në aeroportet e Parisit Charles-de-Gaulle dhe Nice.
Ligji për reformën e pensioneve
Presidenti Emmanuel Macron nënshkroi reformën e pensioneve në ligj vonë më 14 prill pasi Këshilli Kushtetues përfundoi shqyrtimin e tij, pavarësisht kërkesave nga sindikatat për të hequr masën që ka shkaktuar protesta prej disa javësh. Ligji do të rrisë moshën e daljes në pension nga 62 në 64 deri në vitin 2030, duke kërkuar të paktën 43 vjet shërbim për të përfituar pension të plotë. Trazirat u intensifikuan kur kryeministrja Elisabeth Borne, pas konsultimit me Macron, vendosi të përdorë kompetenca të veçanta kushtetuese për të miratuar projektligjin pa miratimin e parlamentit në mars. Vendimi u motivua nga shqetësimet se ligjvënësit do të ishin në gjendje të pengonin reformat për shkak se qeverisë i mungonte një shumicë absolute në parlament. Ligji pritet të hyjë në fuqi më 1 shtator.
