Një tentativë për grabitje me armë ka ndodhur këtë paradite në Vlorë, e cila është vënë nën kontroll nga ana e Policisë.
Burime bëjnë me dije se tre persona të armatosur kanë tentuar që të grabisin një argjendari e cila ndodhet në qendërt të Vlorës, por mbërritja në kohë e Policisë ka bërë që plani i tyre të dështojë. Policia ka shoqëruar 1 prej të dyshuarve, ndërkohë që vijon puna për kapjen e të tjerëve, të cilët ia kanë dalë të largohen pas grabitjes.
Mësohet se dy prej autorëve kanë hyrë brenda argjendarisë, dhe një i tretë i ka pritur jashtë, ndërkohë që policia ka mundur që ta kapë vetëm njërin prej tyre. Fillimisht u tha se nga ngjarja kishte persona të plagosur, por sipas Policisë nuk ka pasur, dhe është qëlluar me plumba manovër.
Policia ka sekuestruar në vendin e ngjarjes, një armë gjahu çifte e cila u përdor nga autorët si dhe një sasi bizhuterish që ata kishin tentuar që të merrnin nga biznesi në fjalë. Vijon puna për identifikimin e personave të tjerë që janë përfshirë në grabitje.
Autori i grabitjes që është ndaluar nga ana e Policisë, është rreth të 50-tave, ndërkohë që ai nuk mban kapuç, por vetëm një maskë kirurgjikale.
Ai kishte hyrë brenda dyqanit si blerës dhe më pas nën kërcënimin e armës ia ka dalë të marrë një sasi bizhuterish, por gëzimi i ka përfunduar shumë shpejt me arrestimin nga Policia.
Banorët që jetojnë pranë dyqanit që u tentua të grabitej thonë se kanë dëgjuar 3-4 të shtëna me armë, ndërkohë që Policia konfirmon se nuk ka të plagosur, dhe gjasat janë që të jetë qëlluar me plumba manovre.
