E dimë sa shëmtuar duken një palë pantallona lino të rrudhosura. Aq më tepër kur jemi në plazh. Sa herë na ka ndodhur të na duhet një hekur dhe të mos e kemi? Sa herë s’e keni veshur fustanin që donit gjatë pushimeve vetëm se në hotel nuk gjetët një hekur? Si i bëhet në këto raste?
Me peshqir të lagur
Vendoseni veshjen e rrudhosur në një sipërfaqe të sheshtë dhe mbi të shtrini një peshqir të lagur dhe të shtrydhur. Shtypeni lehtësisht me dorë në pjesët që kanë më shumë rudha, lëreni të thahet dhe jeni në rregull.
Me tharëse flokësh
Kjo metodë është dhe më e thjeshta. Vareni veshjen në një varëse rrobash, qëndroni 5-10 cm larg dhe drejtojini tharësen e flokëve derisa rudhat të zhduken.
Metoda e dushit
Mbyllni mirë derën dhe dritaren e dushit, vareni veshjen diku dhe bëni dush si zakonisht. Avulli i çliruar ndërkohë që ju laheni do të zhdukë rudhat e krijuara.
Metoda me shishen sprucuese
Vareni veshjen në një ambjent të hapur dhe duke qëndruar rreth 20 cm larg saj, spërkateni me ujë nëpërmjet një shisheje sprucuese, në të cilën mund të shtoni edhe pak pika zbutës rrobash. Lëreni të thahet dhe do të shihni që rudhat do të jenë zhdukur.
Metoda e ibrikut
Metoda e ibrikut është e ngjashme me atë të dushit, por më efektive për rudhat e vogla dhe në pozicione të vështira. Vini ujin në ibrik për të zier dhe kur të fillojë të çlirojë avull, afrojeni pjesën e rudhosur në grykën e ibrikut.
