Qarkullimi i kamionëve dhe betoniereve lëvizëse në çdo orë të ditës dhe të natës pa asnjë kufizim ishte kthyer në një problem të mprehtë për banorët e Tiranës. Për këtë arsye, Bashkia e kryeqytetit vendosi disa vite më parë një orar për qarkullimin e tyre.
Në atë kohë u tha se nuk do të tolerohej askush dhe se masat do të ishin të rënda për çdo shkelës, por e vërteta është se një vendim i tillë nuk është respektuar, kjo konstatohet nëpër rrugët dhe lagjet e Tiranës.
Shumë mjete të tonazhit të rëndë qarkullojnë në zona të ndaluara për ta duke shkelur orarin e vendosur nga bashkia. Përveç ndotjes një problem shqetësues ka të bëjë me sigurinë e qytetarëve të cilët detyrohen shpesh të ecin në rrugë kur bllokohet trotuari nga kamionët dhe mjete te tjera të rënda.
Me fillimin e vitit të ri shkollor, automjetet nga 3.5 ton e deri tek ato me tonazh të rëndë nuk duhet të qarkullojnë në rrugët e brendshme të Tiranës gjatë orëve 07: 00-09:00 të mëngjesit e deri 16:00-18:00 të pasdites.
Mjete të rënda kthehen në rrezik real për kalimtarët. E njëjta gjë ndodh edhe në rrugën dytësore Tiranë-Vorë. Qytetarët kërkojnë të paktën punimet të bëhen natën pasi ndjehen të rrezikuar kur kalojnë në trotuare, ndërsa thonë se janë pagues të taksave në mënyrë të rregullt.
