“Më shikonin me urrejtje”, ish-lojtari i Milanit vret veten pas letrës së lamtumirës

0

Fati i një personi mund të ndryshojë në çdo moment, dhe ai i futbollistit 20-vjeçar Seid Visin, e çoi drejt aktit tragjik të vetëvrasjes, arsyet për të cilën ai i shpjegon me një letër, që po trondit opinionin publik italian.

I lindur në Etiopi por i adoptuar nga një familje italiane në afërsi të Salernos, Said nuk shfrytëzoi të gjithë talentin e tij, ose ky talent ishte i pamjaftueshëm për nivelin e Milanit. I riu u rikthye në jugun e Italisë duke iu bashkuar fillimisht ekipit të Beneventos, por më pas vendosi të ndryshojë jetë. Futbolli për të ishte tashmë vetëm një hobi, që ushtronte në ekipin e tij të kalçetos.

Ndërkohë, zbritja nga “parajsa” e iluzionit të futbollit profesionist dhe rikthimi në përditshmërinë e çdo personi normal, e përballi të riun me diçka që ai nuk kishte përjetuar kurrë më parë, kur ishte disi i njohur. Pikërisht racizmi, që fshihet kur fama dhe paratë janë të shumta, dhe rishfaqet aty ku personat janë më në vështirësi.

“Nuk jam një emigrant. Jam i adoptuar dhe më kujtohet se dikur më donin të gjithë. Por tani gjithçka duket e përmbysur. Kisha gjetur një punë që u detyrova të lej sepse shumë njerëz, veçanërisht më të moshuarit, nuk pranonin të shërbeheshin nga unë, dhe më akuzonin se i hiqja punën të rinjve italianë. Tani kudo që shkoj, ndjej pas shpine vetëm shikime plot urrejtje dhe të trembura”, shkruan Seid në letrën e tij të lamtumirës.

Letra, e botuar nga prestigjiozja Corriere della Sera, po shkakton debate në një vend që po fillon vetëm vitet e fundit të përballët me fenomenin e gjeneratave të dyta dhe të treta të emigrantëve, ligjërisht italianë por praktikisht të mënjanuar, në një shoqëri që i toleron ato kur përfaqësojnë më së miri botën e sportit dhe shoëbizit, por që nuk ka gjetur ende instrumentet për t’i integruar ato si të barabartë në përditshmërinë sociale.

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu