Nevada është shteti qe mban peng shpalljen e fitores nga Joe Biden, të cilit i duhen dhe 6 vota elektrorale, që të mund të sigurojë mandatin e parë për president. Biden ka aktualisht sipas projeksioneve të Fox News 264 vota elektorale, përkundrejt 214 që ka Donald Trump.
Pikërisht Nevada nxjerr 6 vota elektorale, dhe ku sytë e të dyja kampeve politike janë kthyer pikërisht nga kutitë e këtij shteti, ndërkohë që vijojnë akuzat për parregullsi.
Joe Biden kryeson me 49.3% të votave në Nevada, ndërsa Donald Trump e ndjek me 48.7%, kur janë numëruar 75% e të gjitha fletëve të votimit. Prej mbrëmjes së djeshme procesi në këtë shtet duket se ka ngecur, dhe rinumërimi i votave pritet që të fillojë gjatë ditës së sotme.
Ndërkohë që në të tre shtetet e tjera ku ka dhe pak vota për të numëruar, Pensilvani, Karolinën e Veriut dhe në Xhorxhia, Trump është duke kryesuar në raport me Biden, e kur janë numëruar shumica e votave.
Kujtojmë se Biden arriti që të siguronte gjatë ditës së djeshme dy shtete të rëndësishme Wisconsin dhe Michigan, ndërkohë që djali i presidentit aktual Eric Trump, akuzon se ata (demokratët) po bëjnë kërdinë në zgjedhje.
“Ata po shkatërrojnë procesin zgjedhor në këtë vend” tha Eric Trump, referuar demokratëve, duke folur në Filadelfia.