Shtatori pritet të jetë një muaj tepër nxehtë politikisht pasi do të fillojë punën parlamenti i ri dhe gjithashtu priten zhvillimet që do të ndodhin pasi Sali Berisha të vendosë të hyjë për të ushtruar mandatin e tij të deputetit.
Lidhur me zhvillimet politike që pritet të ndodhin, është shprehur edhe avokati Spartak Ngjela i cili ka thënë se muaji shtator do të jetë i anti-korrupsionit dhe se do të sekuestrohen pronat e elitave politike si në Shqipëri ashtu edhe në Kosovë.
Postimi i Plotë nga Spartak Ngjela
Ky do të jetë muaji antikorrupsion… Ky pritet të jetë muaji antikorrupsion në Shqipëri, por, më pas, edhe në Kosovë, kundrejt elitave politike në Tiranë dhe në Prishtinë. Këto elita tani kanë falimentuar; pritet t’u merren paratë dhe pronat.
Shqiptarët e Shqipërisë janë të pushtuar plotësisht nga korrupsioni, reforma antikorrupsion do t’u sjellë çlirimin historik.
Dhe, tani, këtë pushtim e ka goditur me vendim non grata politika e Shteteve të Bashkuara të Amerikës, në nivelin më të lartë të tij: te Sali Berisha.
Domethënë se Amerika po kërkon pastrimin e krerëve të lartë të korrupsionit në Shqipëri?
Por, dy janë figurat politike të kryqëzuara juridikisht në këtë kohë: Ilir Meta dhe Sali Berisha. Të dy nuk kanë më të ardhme, se janë drejt shkarkimit, njëri nga gjykata kushtetuese dhe tjetri nga Komisioni Qendror i Zgjedhjeve.
Sot, në Shqipëri, ligji për Dekriminalizimin, nuk lejon që, personat e dëbuar nga Amerika si persona non grata, të jenë deputetë në Kuvendin e Shqipërisë. Fiks këtë, ka kërkuar edhe ambasadorja e Amerikës në Tiranë. Edhe Sali Berisha tani është një person i tillë, por me një tekst të rreptë diplomatik dhe juridik njëherësh, kundër tij.
Teksti i vendimit të Departamentit të Shtetit, që e ka nxjerrë non grata Sali Berishën, domethënë si të dëbuar nga Shtetet e Bashkuara, e vë theksin se: “Berisha, me gjithë familjen e tij, është një çerdhe e rrezikshme korrupsioni, e cila cënon sigurinë e Amerikës”. Pas kësaj, a ka shqiptar që mund ta pranojë më Berishën si deputet të tij? Kjo pyetje nuk ka nevojë për përgjigje.
Po, Saliu, nuk e kupton dot këtë? Po, as Partia Demokratike nuk e kupton dot këtë?
Megjithatë, e tërë kjo çështje e trajtuar juridikisht kështu, është në dorë të Komisionit Qendror të Zgjedhjeve, për Saliun, dhe të Gjykatës Kushtetuese për Metën. Të shohim vendimet e tyre, por, a do ta zbatojë KQZ-ja ligjin me vendim për mosdhënien e mandatit të deputetit Sali Berishës?
Le të presim…
