Situata në veriun e Kosovës, sulmohet kameramani dhe një qytetar në Mitrovicë! AGK: Të hetohet me urgjencë rasti!

0

Një kameraman kosovar dhe një qytetar tjetër janë sulmuar sot në Mitrovicë të Veriut.

Sulmin e ka konfirmuar për Radion Evropa e Lirë, zëvendësdrejtori i Policisë për rajonin e Mitrovicës së Veriut, Besim Hoti.

Ai ka thënë se rasti po hetohet dhe deri më tani nuk ka ndonjë të arrestuar.

Më herët, mediumi Insajderi.org, ka njoftuar se kameramani i quajtur Jetmir Muji është sulmuar sot.

Në lajmin që është publikuar në Insajderi thuhet se: “Muji është sulmuar nga bandat serbe në veri derisa ishte duke xhiruar rastin e një kidnapimi të një të riu shqiptar në pjesën veriore të Kosovës”.

Deri më tani nuk janë dhënë detaje zyrtare në lidhje me ngjarjen nga Policia e Kosovës apo institucione të tjera.

Ndërkohë, Asociacioni i Gazetarëve të Kosovës ka reaguar ndaj sulmit duke e dënuar ashpër atë.

“(AGK) e fton Policinë e Kosovës, që ta hetojë me urgjencë rastin dhe t’i identifikojë personat përgjegjës”, thuhet në njoftimin e AGK-së.

Rikujtojmë se në katër komunat veriore të Kosovës tashmë ka prezencë dukshëm më të vogël të Policisë të Kosovës për shkak se 578 pjesëtarë të komunitetit serb në këtë institucion dhanë dorëheqje në fillim të nëntorit.

Përveç Policisë, serbët dhanë dorëheqje edhe nga institucione të tjera të Kosovës.

Kjo u bë për të kundërshtuar vendimin e Qeverisë së Kosovës që u kërkon qytetarëve në veri t’i riregjistrojnë veturat që mbajnë ende targa të paligjshme që lëshohen nga Serbia./REL

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu