Vazhdojnë polemikat pas zënkës mes Leonardo Bonuccit dhe zyrtarit të Interit, Cristiano Mozzillo në Superkupën e Italisë. Mbrojtësi i Juventusit ishte viktimë e nervozizmit për moshyrjen në fushë, duke u bërë objekt i një lumi reagimesh në rrjetet sociale.
Massimiliano Allegri kishte vendosur ta hidhte në fushë në minutën e fundit për të fituar sekonda të çmuara dhe për të përdorur një specialist për penalltitë e mundshme. Një moment që nuk është kapur nga kamerat ishte momenti kur Ivan Perisic bën një gjest si për të kërkuar zëvendësimin.
Një situatë që nga shumë tifozë është parë si një tallje e mundshme me Bonuccin apo stolin e Juventusit për atë ndryshim që nuk u bë kurrë.
