“Fitorja e Vjosës nuk është vetëm sukses i çështjeve gjinore, ajo është fitore e një mendësie të re politike dhe civilizimi në konsolidimin e institucioneve dhe demokracisë në Kosovë,” gjykon Albana Vokshi, Kryetarja e Lidhjes Demokratike të Gruas, kandidate e PD-së në Tiranë.
“Vjosa Osmani zgjidhet Presidente e Kosovës, gruaja e dytë që mban postin më të lartë në drejtimin e shtetit, pas Atifete Jahjagës, – vlerëson Vokshi një ditë pasi Kosova zgjodhi kreun e ri të shtetit. – Ndihem e lumtur dhe e frymëzuar për promovimin e grave të shqiptarisë në politikëbërje dhe vendimmarrje në Kosovë dhe trevat shqiptare në rajon.
Fitorja e Vjosës nuk është vetëm sukses i çështjeve gjinore, ajo është fitore e një mendësie të re politike dhe civilizimi në konsolidimin e institucioneve dhe demokracisë në Kosovë.
I uroj Presidentes Osmani suksese dhe sa më shumë forcë e motivim në përballimin e sfidave të shumta të integrimit euro-atlantik të Kosovës,” përfundon mesazhin e saj Vokshi.
