Deputetët e PD-së në Qarkun e Elbasanit, Lefter Gështenja dhe Qani Xhafa, kanë zhvilluar një takim me banorë të zonës që preken nga zgjerimi i rrugës Elbasan-Qafë Thanë.
Ata kanë paraqitur 5 kërkesat që kanë, pvr t’iu dhënë akses në aksin kryesor të rrugës, përmes hyrje-daljeve, mbikalime apo nënkalime, duke i krijuar kështu mundësinë disa fshatrave që të mos izolohen.
Kërkesat e banorëve i janë përcjellë edhe ARRSH-së.
“Banorët nuk janë kundër investimeve, ata janë pro dhe mbështesin ato projekte që u përmirësojnë jetën e tyre por kurrsesi nuk mund të bien dakort me një investim që i izolon dhe vështirëson lëvizjen e tyre të përditshme.
Urojmë dhe shpresojmë që ARRSH t’i marr parasysh kërkesat e tyre më se të drejta”, shkruan Gështenja në një postim në rrjetet sociale.
Një situatë e ngjashme është krijuar me banorët e Fushë Krujës, të cilët duke mos pasur akses në aksin e ri Thumanë-Kashar, kanë mbetur të izoluar, ndërsa kanë protestuar disa herë duke bllokuar rrugën.
