Zbardhet fjala e kryetarit të PD-së, Lulzim Basha në takimin me 153 kandidatët për deputetë në zgjedhjet parlamentare të 25 prillit.
Pasi i ka falenderuar për punën dhe rezultatet, Basha ka thënë se në këto zgjedhje është bërë vjedhja më e madhe ndonjëherë. Megjithatë, Basha është shprehur se “pavarësisht vjedhjes” ai dhe zyrtarë të PD do të vijojnë takimet në terren me qytetarët.
“Fushata jonë nuk ka mbaruar”, ka thënë ndër të tjera Basha.
“Dua të falenderoj secilin nga ju. Ju keni punuar shumë fort me besimin e palëkundur në rrugën tonë, në demokracinë tonë, në vendin tonë. Pavarësisht vjedhjes më të madhe të votave në historinë e Shqipërisë të kryer nga Rama-Doshi, ne sollëm një arritje të madhe për partinë tonë dhe për vendin tonë. Ne, pa hequr dorë nga vlerat tona, u bëmë më të fortë kudo.
Tani do të luftojmë me të gjitha fuqinë tonë derisa në fitore. Fushata jonë nuk ka mbaruar, ajo vazhdon me energji maksimale. Unë do takoj njerëzit në terren, për t’i falënderuar, për të biseduar me ta, për t’i dëgjuar, duke ju kërkoj që edhe ju të bëni të njëjtën gjë në ditët në vijim. Së bashku do të fitojmë”, është shprehur Basha në takimin me kandidatët e PD në selinë blu.
