Vendimi, i cili tashmë kishte disa kohë në ajër, është zyrtarizuar më 24 qershor 2021 nga Komiteti Ekzekutiv i UEFA-s: nuk do të ketë më vlerë dyfishe goli i shënuar në transfertë.
Dhe me ndeshjet e ardhshme të Champions League, Europa League dhe Conference League, efektet konkrete të kësaj zgjedhjeje do të kuptohen. Një risi epokale, e vlefshme për të gjitha kupat europiane: numri i golave të shënuar jashtë shtëpisë nuk vlen më përv t’u kualifikuar, një rregull i futur në 1965. Nëse dy skuadra shënojnë të njëjtin numër golash gjatë kohës së rregullt, ndeshja duhet të shkojë në kohë shtesë. Dhe më pas, përfundimisht, vijnë penalltitë.
Ishte vetë presidenti i UEFA-s, Ceferin, i cili shpjegon arsyet që çuan në këtë pikë kthese: “Çështja është debatuar në takime të ndryshme vitet e fundit. Edhe pse nuk ka pasur unanimitet mendimesh, shumë trajnerë, tifozë dhe futbollistë, kanë vënë në dyshim korrektësinë dhe kanë shprehur një preferencë për shfuqizimin e rregullit.
Ndikimi i rregullit tani shkon kundër qëllimit të tij fillestar, pasi në mënyrë efektive i pengon ekipet vendase, veçanërisht në ndeshjen e parë, të sulmojnë sepse kanë frikë mos pësojnë një gol që do t’i favorizonte kundërshtarët e tyre për ndeshjen e kthimit. Ata kritikojnë gjithashtu padrejtësinë, veçanërisht në kohën shtesë, për të detyruar ekipin vendas të shënojë dy herë kur skuadra mysafire ka shënuar. Ndeshjet në shtëpi sot nuk janë më aq të rëndësishme sa dikur.
Duke marrë parasysh konsistencën në të gjithë Europën për sa i përket stilit të lojës dhe shumë faktorë të ndryshëm, që kanë çuar në një rënie të përparësisë së ndeshjeve të shtëpisë, Komiteti Ekzekutiv i UEFA-s mori vendimin e duhur, duke miratuar pikëpamjen, se nuk është më e përshtatshme që një gol jashtë fushe të ketë më shumë peshë se ai i shënuar në shtëpi”.
