Viktima dhe autori ishin shokë me njëri-tjetrin, madje ky i fundit shkonte herë pas here në shtëpinë e 51-vjeçarit.
Lidhur me ekzekutimin e Aleksandër Zakës në Greqi në 12 gusht 2023, tashmë është publikuar fotoja e autorit. Ky i fundit, një ditë para se ta vriste ishte në shtëpinë e viktimës. 51-vjeçari nga Lushnja u gjet i ulur në një karrige në oborrin e banesës së tij i ekzekutuar. Vrasja e shqiptarit vijon të mbetet e pazbardhur.
Mediat greke shkruajnë se është identifikuar autori i vrasjes, ndërsa ende nuk dihet shkaku që çoi në ekzekutimin e Zakës në Greqi. Viktima dhe autori ishin shokë me njëri-tjetrin, madje ky i fundit shkonte herë pas here në shtëpinë e 51-vjeçarit.
Një ditë para krimit, në shtëpi ndodheshin dy shqiptarët dhe një shtetas grek. Gjatë mbrëmjes, shtetasi grek është larguar nga banesa dhe në shtëpi kanë qëndruar viktima dhe autori i dyshuar. Ky i fundit do të flinte në banesën e 51-vjeçarit.
Por kur shtetasi grek është kthyer të nesërmen, ai e ka gjetur viktimën të ulur në një karrige i qëlluar me plumb në pjesën e pasme të kokës. Ndërkohë shqiptari rezulton i zhdukur, dhe autoritetet janë vendosur në kërkim të tij. Autori i dyshuar rezulton me precedentë penalë për drogë dhe vjedhje. Ai është në arrati që prej ditës së shtunë, kur ndodhi edhe vrasja.
