Është arrestuar nga policia, i riu i cili ditën e sotme plagosi me thikë një person në Durrës.
Mësohet se në pranga ka rënë një 30-vjeçar, i cili plagosi me thikë një 17-vjeçar në zonën e plazhit.
Sipas policisë, mes dy personave ka pasur një konflikt që më pas degradoi në dhunë, teksa në fund 30-vjeçari qëlloi me thikë adoleshentin dhe u largua. I mituri ndodhet në spital, nën kujdesin e mjekëve teksa raportohet se është jashtë rrezikut për jetën.
Njoftimi i policisë:
Dëmtoi me mjet prerës, një 17-vjeçar, për shkak të një konflikti për motive të dobëta, kapet menjëherë pas ngjarjes dhe shoqërohet në ambientet e Policisë 30-vjeçari.
Pasditen e sotme, në lagjen nr. 13, dyshohet se për shkak të një konflikti për motive të dobëta, ndërmjet shtetasit B. M., 30 vjeç dhe një 17-vjeçari, në ambientet e jashtme të një picerie, shtetasi B. M. ka dëmtuar me mjet prerës (thikë), 17-vjeçarin, i cili ndodhet në spital, në kujdesin e mjekëve dhe është jashtë rrezikut për jetën.
Menjëherë pas njoftimit, shërbimet e Stacionit të Policisë Plazh kanë mbërritur në vendngjarje, kanë kapur shtetasin B. M. dhe e kanë shoqëruar atë, në ambientet e Stacionit të Policisë, për kryerjen e veprimeve të mëtejshme procedurale.
Materialet procedurale do t’i kalojnë Prokurorisë së Durrësit, për kryerjen e hetimeve të mëtejshme.
