KUÇOVË – Një ngjarje e rëndë ka ndodhur sot në Kuçovë, ku një punonjëse e pastrimit ka ngjitur majën e një kulle pranë ish-Uzinës së qytetit, duke kërcënuar jetën e saj. Sipas burimeve, arsyeja e këtij akti ekstrem lidhet me mosmarrjen e pagës për dy muaj dhe trajtimin e padrejtë nga kompania e pastrimit.
Ngjarja ka tërhequr menjëherë reagimin e autoriteteve lokale, të cilët kanë ndërhyrë për të parandaluar ndonjë tragjedi. Burime nga vendi i ngjarjes raportojnë se punonjësja po merr mbështetje psikologjike dhe është larguar nga situata e rrezikshme.
Lidhur me rastin ka reaguar edhe deputeti Lefter Maliqi, i cili në rrjetet sociale ka bërë me dije se punonjësja nuk kishte marrë pagat për dy muaj, duke kërkuar ndërhyrjen e institucioneve për zgjidhjen e problemit dhe respektimin e të drejtave të punonjësve.
Rastet e mospagesës dhe trajtimit të padrejtë të punonjësve kanë ngritur shqetësime mbi monitorimin e kompanive që ofrojnë shërbime publike dhe respektimin e të drejtave të punës në nivel lokal. Autoritetet përkatëse po vijojnë hetimet për të verifikuar shkeljet dhe për të marrë masat e nevojshme për mbrojtjen e punonjësve.
