Në një intervistë për RTV Ora, ish-anëtarja e kryesisë së PD-së, Endira Bushati u shpreh se ka pasur sondazhe përgjatë kryesimit të Bashës në PD, ku gjithmonë ka kryesuar dhe i preferuari ka qenë Berisha.
Ajo tha se demokratët e kanë pranuar zotin Basha sepse kanë menduar se atë e do Berisha dhe në momentin që ikën kjo garanci, Basha nuk është më kreu i PD-së.
Bushati: Ka pasur sondazhe që kanë dalë ku në fakt, përgjatë kryesimit të Bashës në PD, gjithmonë ka kryesuar dhe i preferuari ka qenë Berisha. Prandaj besoj se mbështetja për Berishën në PD do të jetë e madhe. Ka një reagim publik kundër vendimit të Bashës për të përjashtuar Berishën. Kjo është një betejë brenda shtëpisë.
Demokratët e kanë pranuar zotin Basha sepse kanë menduar se atë e do Berisha. Në momentin që ikën kjo garanci, ne jemi sot dëshmitar që Basha nuk është më kreu i PD-së, me atë vendim që mori. Berisha e quajti pabesi veprimin e tij. Basha nuk ka më forcën që të përballet me askënd, qoftë edhe me vetë grupin parlamentar të PD-së.
Bushati shtoi se Basha humbi zgjedhjet, tha se ishte një masakër zgjedhore dhe kaq, por më pas u zhduk edhe pse tha se tani fillon lufta.
Bushati: Basha humbi zgjedhjet. U tha se ishte një masakër zgjedhore dhe kaq. Basha u zhduk edhe pse tha se tani fillon lufta. Më pas u zhduk dhe në mënyrë krejt të beftë shpalli zgjedhjet për kryetar e organet drejtuese të partisë. Në fakt zgjedhjet duhet të mbaheshin në fund të korrikut, por ai i bëri në qershor. Më pas ai doli të enjten, një ditë para kuvendit duke dhënë atë vendim që dha.
