Administrata Biden beson se Rusia do të kërcënojë se do të vrasë familjet e ushtarëve ukrainas nëse ata nuk dorëzohen. CNN shkruan se lajmi është konfirmuar nga një zyrtar amerikan, në mes të pushtimit të vazhdueshëm rus të Ukrainës.
“Informacionet tona tregojnë gjithashtu se Rusia planifikon të kërcënojë me vrasjen e anëtarëve të familjeve të ushtarëve ukrainas nëse ata nuk dorëzohen,”- tha zyrtari, i cili gjithashtu përgëzoi “trimërinë e jashtëzakonshme” që ukrainasit treguan në ditën e parë të luftimeve. Departamenti i Shtetit nuk u përgjigj menjëherë kur u pyet se pse SHBA besojnë se kjo është ajo që do të bëjnë rusët. Sekretari i Shtetit Antony Blinken kohët e fundit ka paralajmëruar për mundësinë e shkeljes së të drejtave të njeriut kundër popullit ukrainas të kryera nga Rusia.
“Të gjitha provat sugjerojnë se Rusia synon të rrethojë dhe kërcënojë Kievin,”- tha ai të enjten.
Ministri i Jashtëm i Ukrainës u bëri jehonë shqetësimeve të SHBA-ve për mundësinë e shkeljeve të të drejtave të njeriut. Duke cituar inteligjencën, Ministri i Jashtëm ukrainas Dmytro Kuleba tha se mund të ketë operacione të rreme që gabimisht do t’i konsideronin ukrainasit si agresorë.
“Sipas inteligjencës, Rusia planifikon një operacion masiv të rremë për të ‘çhumanizuar’ ukrainasit dhe për të akuzuar Ukrainën për veprime të supozuara çnjerëzore. Mos u besoni falsifikimeve. Ukraina mbron tokën e saj në një luftë të drejtë dhe mbrojtëse. Ndryshe nga Rusia, ne nuk synojmë civilët,”- shkroi Kuleba në Twitter .
Zyrtari amerikan tha gjithashtu se Kremlini po kryen një fushatë dezinformimi për të sugjeruar se një numër i madh i trupave ukrainase tashmë janë dorëzuar te forcat ruse.
“Ne lavdërojmë popullin ukrainas për shfaqjen e forcës dhe vendosmërisë në përgjigje të një sulmi të provokuar nga një ushtri shumë më e madhe”, tha zyrtari, duke shtuar “Ne jemi të shqetësuar, megjithatë, se Rusia planifikon t’i dekurajojë ata dhe të nxisë dorëzimin përmes dezinformimit. Informacioni ynë tregon se Rusia po krijon një fushatë dezinformimi duke publikuar raporte të rreme për dorëzimin e trupave ukrainase.”
