Gazetari rus, Dmitry Muratov, ka ndërmarrë një nismë për të ndihmuar refugjatët ukrainas që po largohen nga vendi i tyre për shkak të luftës. Bashkë me Maria Ressan, me të cilën ka fituar çmimin “Nobel për paqe”, ai ka nxjerrë në ankand medaljen e tij dhe nëpërmjet gazetës “Novaya”, me bazë në Moskë, ka bërë thirrje për armëpushim në Ukrainë.
Kryeredaktori i gazetës së pavarur “Novaya”, me bazë në Moskë, Dmitry Muratov, ka vendosur të nxjerrë në shitje medaljen e tij të Çmimit “Nobel”, me qëllim mbledhjen e fondeve për refugjatët ukrainas, të cilët janë detyruar të ikin për shkak të pushtimit rus të Ukrainës.
Muratov, i cili është nderuar me Çmimin “Nobel për Paqe” më 2021, në betejën e tij për të ruajtur të vërtetën, e ka bërë të ditur këtë njoftim në gazetën e tij më 22 mars.
“U bëj thirrje grupeve të ankandeve, që janë të interesuara për këtë çmim të njohur në gjithë botën, të na kontaktojnë neve”, ka thënë Muratov, i cili ka fituar çmimin bashkë me Maria Ressan, bashkëthemeluese e faqes “Rappler”.
Muratov dhe “Novaya Gazeta” kanë bërë thirrje edhe për zbatim të pesë masave në Ukrainë: armëpushim, shkëmbim të burgosurve, riatdhesimin e të vdekurve, krijimin e korridoreve humanitare dhe ofrimin e ndihmës për refugjatët.
Dhjetëra mijëra trupa ruse kanë pushtuar Ukrainën prej kur Moska ka nisur sulmet më 24 shkurt. Prej fillimit të marsit, Muratov dhe gazeta e tij kanë shmangur raportimin për situatën në Ukrainë, për shkak të censurës dhe kërcënimit për gjykim penal ndaj gazetarëve.
Një ligj i përkrahur së fundi nga presidenti rus, Vladimir Putin parashikon dënim me burgim në deri 10 vjet për ata që nuk ndjekin linjën qeveritare.
