Një alarm për bombë është raportuar paraditen e kësaj të mërkure në shkollën “Xhevdet Doda”, në Prishtinë.
Bëhet me dije se drejtuesit e kësaj shkolle kanë marrë kërcënime përmes e-mail-it. Pas këtij alarmi, forca të shumta policie kanë mbërritur në vendngjarje dhe kanë evakuar nxënësit.
Lajmi është konfirmuar nga zëdhënësja e Policisë së Kosovës për Rajonin e Prishtinës, Florie Ahmeti.
“Sot rreth orës 11:00 është pranuar informata për dyshimet që ndërlidhen me një shpërthim të mundshëm në shkollën “Xhevdet Doda” në Prishtinë. Informacionet e para flasin se kanosja e dyshimtë ka ardhur përmes postës elektronike. Policia menjëherë ka dalë në vendin e ngjarjes dhe ka nisur ndërmarrjen e veprimeve operative të nevojshme për të menaxhuar me situatën në atë zonë. Ndërkohë që në një perimetër të caktuar policia ka evakuar nxënësit dhe personelin e shkollës, specialist të policisë po trajtojnë dhe verifikojnë informatën”, ka thënë Ahmeti.
Ndërkohë ditën e djeshme gjithashtu, mediet kosovare raportuan një alarm për bombë në ambientet e universitetit “Hasan Prishtina”, i cili më pas rezultoi i rremë.
