Emmanuel Macron dhe Elon Musk janë takuar më herët gjatë ditës së sotme në sfondin e “zogut blu” në internet, gjatë vizitës së presidentit francez në SHBA.
Macron mori konfirmimin nga pronari i ri i Twitter-it se, pavarësisht ndryshimeve të fundit, platforma e rrjeteve sociale do të vazhdojë t’i nënshtrohet rregulloreve evropiane, pa cenuar lirinë e fjalës, duke përjashtuar përmbajtjet e dhunshme dhe ekstremiste dhe duke u bazuar në mbrojtjen e fëmijëve në internet.
Lajmin e takimit me miliarderin e teknologjisë e ka bërë të ditur presidenti francez përmes postimeve në Twitter, duke theksuar se kanë pasur një diskutim të qartë dhe të sinqertë në lidhje me funksionimin e platformës brenda kufijve evropianë.
Në veçanti, Musk e siguroi Macron-in se mbrojtja e lirisë së fjalës është në “duar të mira”, ndërsa përmbajtja e publikuar nga përdoruesit kalon përmes kontrollit të rreptë duke parandaluar përhapjen e mesazheve të dhunshme dhe ekstremiste në internet.
Gjithashtu, ata ranë dakord të përmirësojnë veprimet në platformën dixhitale në lidhje me mbrojtjen e fëmijëve. Siç shkroi ai: “Elon Musk u angazhua për këtë sot. Le t’i mbrojmë fëmijët tanë më shumë në internet!’
