Finlanda do t’i dorëzojë Ukrainës paketën e saj më të madhe të mbrojtjes deri më tani, me më shumë se 400 milionë euro, tha në një deklaratë të premten ministria e mbrojtjes e vendit.
“Ukraina vazhdon të ketë nevojë për mbështetje në mbrojtjen e territorit të saj dhe paketa aktuale e materialeve të mbrojtjes është padyshim më e madhja deri më sot”, tha ministri i Mbrojtjes Mikko Savola.
Deklarata theksoi se Finlanda do të dërgojë artileri të rëndë dhe municione, por nuk hynë në detaje. Paketa e fundit e mbrojtjes e çon shumën totale të ndihmës ushtarake për Ukrainën në 590 milionë euro.
Njoftimi vjen përpara një mbledhjeje të aleatëve perëndimorë në bazën ajrore Ramstein në Gjermani të premten. Udhëheqësit ushtarakë do të diskutojnë për rritjen e mbështetjes së tyre për Kievin mes presionit në rritje ndaj Gjermanisë për të dërguar tanke në Ukrainë.
Ministrat e mbrojtjes të Finlandës dhe Suedisë do të nënshkruajnë një deklaratë të synimit për mbështetjen për Ukrainën në takimin Ramstein, thekson deklarata. Stokholmi njoftoi planet e veta për të dërguar një tjetër paketë të madhe ushtarake, duke përfshirë sistemin e artilerisë Archer, të enjten.
“Mbështetja e përbashkët për Ukrainën është një shenjë e besimit të thellë të ndërsjellë dhe bashkëpunimit gjithnjë e më të ngushtë të mbrojtjes midis Finlandës dhe Suedisë”, thuhet në deklaratë.
Të dy vendet vendosën të aplikojnë për anëtarësim në NATO vitin e kaluar, duke thënë se duan t’i bashkohen aleancës ushtarake “njëkohësisht”.
