MAROK-Pothuajse në minutat e para që u publikua lajmi për tërmetin e së premtes në Marok, erdhën oferta ndihme nga e gjithë bota. Por vendi deri tani vendi ka qenë selektiv në atë që ka zgjedhur të pranojë, shkruan BBC.
Ministria e Brendshme ka deklaruar të dielën se Maroku “u ishte përgjigjur në këtë fazë ofertave të mbështetjes nga vendet mike: Spanja, Katari, Britania e Madhe dhe Emiratet e Bashkuara Arabe”. Spanja ka dërguar një njësi kërkim-shpëtimi me qen nuhatës dhe Britania e Madhe ka zhvendosur ekip të ngjashëm.
Ndihma franceze është në gatishmëri, por kreu i një bamirësie të shpëtimit, Secouristes sans Frontieres, tha se punonjësve të tij të ndihmës nuk u ishte dhënë miratimi nga qeveria marokene.
Po ashtu, Algjeria, e cila ndërpreu marrëdhëniet diplomatike me fqinjin e saj afrikano-verior dy vjet më parë, tha se mund të dërgonte 80 punëtorë të specializuar të shpëtimit nga forcat e saj të mbrojtjes civile.
Ka pasur edhe oferta nga SHBA, Tunizia, Turqia dhe Tajvani ndër të tjera. Por vendimi se çfarë ndihme të mirëpritet është kapur në çështjet e sovranitetit dhe gjeopolitikës.
Ka marrëdhënie të tensionuara midis Francës dhe Marokut, për shembull, pjesërisht si rezultat i lëvizjeve të presidentit francez Emmanuel Macron për t’u afruar me Algjerinë. Por autoritetet franceze janë përpjekur të nënvlerësojnë çdo pretendim se ishin shpërfillur.
“Është gabim”, është cituar të ketë thënë ministrja e Jashtme, Catherine Colonna. “Ne jemi të gatshëm ta ndihmojmë Marokun. Është vendim sovran dhe u takon atyre të vendosin”.
Maroku ka thënë se dëshiron të mbajë situatën nën kontroll dhe se “nuk dëshiron të rrezikojë situatë potencialisht kaotike me dhjetëra vende dhe organizata që vijnë për të ndihmuar”.
Kritiku i Qeverisë dhe aktivisti Maati Mounjib ka thënë se kjo është përgjigje e gabuar, në një kohë kur vendi ka nevojë për ndihma urgjente, veçanërisht në zona më të largëta.
“Unë mendoj se është me të vërtetë gabim të këmbëngulësh në sovranitetin dhe krenarinë kombëtare. Ky nuk është momenti për të refuzuar, sepse ndihma është thelbësore, madje edhe vendet e zhvilluara pranojnë ndihmën e jashtme në fatkeqësi”, ka thënë ai për “Newsday” të BBC-së.
Hossam Elsharkawi, drejtor rajonal për Lindjen e Mesme dhe Afrikën e Veriut në Federatën Ndërkombëtare të Shoqatave të Kryqit të Kuq dhe Gjysmëhënës së Kuqe (IFRC), ka hezituar të kritikonte autoritetet marokene në këtë kohë kaq të vështirë, por ka shtuar se një ditë është e pashmangshme që të kërkohet ndihmë nga jashtë.
