Futbollisti Ermir Lenjani ka vendosur të tërhiqet nga Kombëtarja e Shqipërisë.
Lajmi është bërë i ditur nga vetë lojtari, nëpërmjet një postimi në rrjetet sociale, teksa është zyrtarizuar edhe nga FSHF.
“10 VITE KUQEZI, 10 VITE KRENARI & REALIZIM I ËNDRRËS SË FËMIJËRISË
Të dashur miq,
Dua t’ju njoftoj se kam vendosur të tërhiqem nga Kombëtarja shqiptare. Një vendim aspak i lehtë, por besoj që është momenti i duhur. Për mua ka qenë gjithmonë nder dhe përgjegjësi e madhe të vesh fanellën e kombit tim.
Jam shumë krenar që emri im është pjesë e historisë së futbollit shqiptar dhe që ëndrra ime e fëmijërisë u realizua në vitin 2016, ku bëmë krenarë kombin kuqezi me përfaqësimin historik për herë të parë në një Kampionat Europian.
Kam plot momente të bukura me fanellën kuqezi, që nga debutimi në ndeshjen ndaj Bjellorusisë, te goli i parë në Elbasan Arena ndaj Danimarkës, fitorja historike në Francë 2016 ndaj Rumanisë dhe grumbullimi im i fundit në muajin mars 2023 me Kombëtaren, ku nisi edhe rruga drejt kualifikimit në Euro 2024.
I jam falënderues Zotit, familjes time dhe çdo personi që më ka qëndruar pranë në çdo moment. Çdo fillim e ka një fund dhe rrugëtimi im nuk do të ishte i mundur pa trajnerët Gianni De Biasi, Christian Panucci, Edoardo Reja dhe Sylvio Mendes Campos Júnior, të cilët dua t’i falënderoj nga zemra për besimin e dhënë.
Gjithashtu, dua të falënderoj stafin teknik të Kombëtares, Federatën Shqiptare të Futbollit, Presidentin Armand Duka dhe të gjithë shokët e skuadrës që më kanë mbështetur në rrugëtimin më të veçantë të jetës time.
Në fund, falënderimi im më i madh është për tifozët e Kombëtares shqiptare. Në çdo stadium në Shqipëri dhe në Europë jemi ndjerë si në shtëpinë tonë, falë jush, tifozët më të mirë në botë. Tani e tutje jam si të gjithë ju, gjithmonë krah Kombëtares shqiptare dhe djemve kuqezi. Faleminderit nga zemra shqiptarë. Një kapitull i mbyllur, por një rrugë e përjetshme!”- shkruan Lenjani.
Nga ana tjetër, FSH shprehet se lojtari largohet kryelartë nga ekipi kombëtar.
“10 vite kuqezi, Ermir Lenjani ka marrë vendimin për t’u tërhequr nga Kombëtarja, pasi ka përjetuar emocione të shumta, ishte në Euro 2016 në Francë dhe me ëndrrën e realizuar largohet kryelartë mes falënderimeve.”– thuhet në reagimin e FSHF.
Lenjani është aktivizuar për 10 vite, në 44 ndeshje zyrtare me Kombëtaren, ku ka shënuar 5 gola dhe ka dhënë një asist. Por numrat nuk mund të shprehin kountriburtin e madh që Lenjani ka dhënë në fushë dhe rëndësinë që ka patur.
Ai ka qenë pjesë e skuadrës që u kualifikua për herë të parë në historinë e vendit tonë në një Europian, atë të vitit 2026, të organizuar në Francë. Po ashtu, ai ishte pjesë e ekipit kombëtar edhe në kualifikueset e Euro 2024.
