Ish-kryeministri Sali Berisha ka përcjellë një mesazh urimi për qytetarët e Elbasanit dhe mbarë shqiptarët me rastin e Ditës së Verës.
“Qytetarëve të Elbasanit, banorëve të këtij vendi dhe gjithë shqiptarëve, ju uroj nga zemra këtë festë të lashtë, më të bukurën e festave! Kjo është festa e lëndimit të natyrës, e shpresës, festa e bukurisë së luleve.”
Duke theksuar rëndësinë e kësaj dite, Berisha u shpreh se kjo festë i gjen shqiptarët më optimistë dhe më besimplotë se kurrë për ndryshimin e madh që ai premton në 11 maj.
“Kjo ditë frymëzon çdo shqiptar që më 11 maj të ndahet nga ky regjim, i cili i varfëroi ata gjer në palcë. Dhe unë sot nga Elbasani premtoj se në tre muajt e parë të qeverisjes tonë, paketa e ndihmës do të ndihmojë çdo shqiptar të dalë nga varfëria ekstreme. Do të ketë një minimum jetik prej 200 eurosh për çdo pensionist, pavarësisht sa e ka pensionin aktual. Do të ketë një shpërndarje të re të të ardhurave buxhetore, një rritje prej 20% të pensioneve dhe një rrogë minimale 25% më të lartë se ajo që është sot, duke shkuar në 500 euro. Rroga mesatare do të arrijë në 1,200 euro.”
Ai kujtoi se për herë të parë kishte premtuar dyfishimin e rrogave pikërisht në Elbasan dhe theksoi se e kishte mbajtur premtimin. “Sërish po ju them, rrogat do të dyfishohen dhe ne nuk do të ndalemi derisa të bëhemi përsëri njerëzit më të paguar në rajon.”
Sipas tij, kur shqiptarët të bëhen njerëzit më të paguar në rajon, do të thotë që pasuritë e vendit do të shpërndahen me drejtësi dhe do të ndahen në mënyrë të barabartë, duke reduktuar hendekun e madh mes të pasurve dhe të varfërve.
Fjalimi i Berishës u mbajt në Elbasan, qyteti që është simbol i Ditës së Verës, duke shënuar një moment të rëndësishëm në mesazhin e tij për ndryshimin dhe të ardhmen e vendit.
