SHBA- Disa persona u arrestuan në Los Angeles të shtunën për rezistencë ndaj arrestimeve nga Zyra e Imigracionit dhe Doganave (ICE), e cila ka përfshirë Shtetet e Bashkuara për javë të tëra për të gjurmuar dhe arrestuar emigrantë të paligjshëm si pjesë e një operacioni të urdhëruar nga Presidenti Donald Trump.
“Ka pasur tashmë disa arrestime për pengimin e operacioneve tona. Do të ketë shumë të tjera që do të vijnë. Po shqyrtojmë videot për të identifikuar autorët. Ju sillni kaosin, ne sjellim prangat,” shkroi zëvendësdrejtori i FBI-së, Dan Bonzino, në një postim në platformën X.
Oficerët e ICE u mblodhën këtë mëngjes pranë një dyqani Home Depot, ku emigrantët e paligjshëm ofrojnë shërbime duke marrë në këmbim paga. Por nuk është e qartë nëse agjentët e ICE po përgatiteshin të arrestonin emigrantë të paligjshëm apo u mblodhën atje për tu përgatitur për ndonjë operacion.
Kur u vu re prania e tyre, u ngrit tensioni dhe zyra e sherifit tha se kishte vendosur oficerë për të rivendosur rendin. Protestuesit hodhën objekte drejt oficerëve dhe u përpoqën të bllokonin një autobus që të largohej nga zona, por oficerët shpërndanë turmën me gaz lotsjellës dhe granata zhurmuese.
Disa orë më vonë, rrugët ishin të mbushura me mbeturina dhe karroca të përmbysura pazari, siç shihet në pamjet e transmetuara nga rrjetet televizive, të cilat raportuan gjithashtu se disa protestues i vunë flakën një flamuri amerikan. Incidente të ngjashme ndodhën edhe të premten në Los Angeles, ku protestuesit hodhën vezë në automjetet e ICE pasi agjentët arrestuan emigrantë pa dokumente.
Imazhet e postuara në Platformën X tregojnë dhjetëra agjentë të armatosur rëndë me uniforma ushtarake që përballen me protestuesit. Tom Homan, i cili është përgjegjës për zbatimin e politikës së deportimeve masive të emigrantëve të paligjshëm, njoftoi se forcat e Gardës Kombëtare do të vendosen në Los Angeles të shtunën në mbrëmje. Që kur u kthye në Shtëpinë e Bardhë në janar, Presidenti Trump ka shtuar përpjekjet për të deportuar sa më shumë emigrantë të paligjshëm nga Shtetet e Bashkuara.
