Një 48-vjeçar nga Delvina është shpallur në kërkim pasi ka humbur kontaktet me familjarët dhe kolegët prej dy ditësh. Rasti është denoncuar në Komisariatin e Policisë Delvinë nga një bashkëpunëtor i tij, gjithashtu çoban.
Sipas njoftimit zyrtar të Policisë së Vlorës, më datë 3 korrik, shtetasi A.K., 52 vjeç, është paraqitur në komisariat duke deklaruar se më datë 2 korrik ka humbur kontaktet me kolegun e tij A.Ç., 48 vjeç, me të cilin punonte në të njëjtën zonë si çoban.
“Pas kallëzimit të bërë nga shtetasi A.K., shërbimet e Policisë kanë nisur menjëherë hetimet për gjetjen e shtetasit të zhdukur dhe për zbardhjen e rrethanave të ngjarjes”, thuhet në deklaratën zyrtare të policisë.
Aktualisht nuk ka të dhëna të tjera mbi vendndodhjen e 48-vjeçarit apo ndonjë konflikt të mundshëm që mund të ketë ndikuar në zhdukjen e tij. Policia ka nisur kërkimet në terren dhe pritet që grupi hetimor të marrë në pyetje persona të afërt për të ndihmuar në zbardhjen e plotë të rastit.
Ngjarja ka shqetësuar banorët e zonës, ndërsa autoritetet kërkojnë bashkëpunim nga publiku për çdo informacion që mund të ndihmojë në lokalizimin e tij.
