AUSTRALI- Një person ka vdekur dhe 300 prona janë shkatërruar nga zjarret që kanë goditur Australinë juglindore. CNN raporton se, zjarret kanë shpërthyer në dhjetëra zona të vendit prej disa ditësh, kryesisht në shtetin e Viktorias, por edhe në Uellsin e Ri Jugor, duke shkatërruar një sipërfaqe pothuajse dyfish më të madhe se Londra.
Në Victoria është shpallur gjendje e jashtëzakonshme, ndërsa mijëra zjarrfikës dhe më shumë se 70 avionë po luftojnë me flakët. Banorët në më shumë se një duzinë komunitetesh janë këshilluar të evakuojnë shtëpitë e tyre. Autoritetet kanë frikë se zjarret, të cilat po nxiten nga kushtet shumë të nxehta, të thata dhe me erë, mund të vazhdojnë për disa javë.
Kryeministrja e Viktorisë, Jacinta Allan, tha se 30 zjarre aktive po digjen në të gjithë shtetin, 10 prej të cilave ishin veçanërisht shqetësuese. Sipas saj, 350,000 hektarë ishin djegur në të gjithë shtetin që nga ora 8:00 e mëngjesit të së dielës. “Zjarret do të vazhdojnë për njëfarë kohe në të gjithë shtetin dhe kjo është arsyeja pse nuk e kemi kaluar ende më të keqen. Ka zjarre që janë duke u zhvilluar tani dhe po kërcënojnë shtëpitë dhe pronat.”, tha ajo për mediat australiane.
Tymi nga zjarret po ndikon në cilësinë e ajrit në shumë zona të Viktorias, përfshirë zonën metropolitane të Melburnit. Autoritetet thanë se zjarret janë më të këqijat që kanë goditur Australinë juglindore që nga zjarret në shkurre të viteve 2019-2020, të cilat shkatërruan një zonë me madhësinë e Turqisë dhe vranë 33 persona.
Edhe pse është e vështirë të lidhësh zjarret individuale me ndryshimet klimatike, pasi mënyra se si njerëzit e menaxhojnë tokën mund të jetë një faktor, shkencëtarët thonë se ndryshimet klimatike po i bëjnë kushtet e motit të nxehtë dhe të thatë që favorizojnë zjarret në pyje më të zakonshme.
