Ambasada ukrainase në Shqipëri i ka hedhur poshtë deklaratat e Ministrit të Jashtëm rus Sergej Lavrov, se në Donbas ka mercenarë shqiptarë. Me anë të një deklaratë, bëhet me dije se nuk po synohet asnjë operacion sulmues në rajonet e pushtuara të Donetskut dhe Luhanskut. Gjithashtu shkruhet se ata e kundërshtojnë fuqimisht përpjekjet ruse për të përkeqësuar situatën e tensionuar.
Postimi i Plotë:
Shtetasit ukrainas banojnë në të dy anët e linjës së kontaktit. Paqja, siguria dhe mirëqenia e tyre janë një prioritet absolut për Ukrainën. Pretendimet se qeveria ukrainase synon të nisë një operacion sulmues në territoret e pushtuara përkohësisht të rajoneve Donetsk dhe Luhansk janë të shkëputura nga realiteti. Ukraina gjithashtu nuk po kryen apo planifikon asnjë akt sabotues në Donbas.
Ne kundërshtojmë kategorikisht përpjekjet e Rusisë për të përkeqësuar situatën tashmë të tensionuar të sigurisë. Ne mbetemi fort të përkushtuar ndaj zgjidhjes politiko-diplomatike dhe, së bashku me partnerët tanë, maksimizojmë përpjekjet për të ulur tensionin dhe për ta mbajtur situatën në linjë me dialogun diplomatik. Në të kundërt, ne vëzhgojmë Federatën Ruse duke shpalosur fushatën e saj për të shpërndarë dezinformata masive, duke rritur granatimet e pozicioneve të Ukrainës dhe infrastrukturës civile, duke përdorur armët e ndaluara nga Marrëveshjet e Minskut dhe duke përshkallëzuar situatën e sigurisë.
I bëjmë thirrje komunitetit ndërkombëtar, shteteve të huaja dhe organizatave ndërkombëtare që të dënojnë menjëherë provokimet e kryera nga Federata Ruse dhe administratat e saj pushtuese në Donbas, duke minuar procesin e zgjidhjes politiko-diplomatike. Mungesa e reagimit të duhur ose një qëndrimi neutral do të shërbejë vetëm për përshkallëzim të mëtejshëm.
