Ish-kryeprokurorja e Gjykatës Ndërkombëtare Penale, Carla Del Ponte bëri thirrje që të lëshohet një urdhër arresti ndërkombëtar për presidentin rus Vladimir Putin.
Në intervistat e dhëna për mediat zvicerane me rastin e botimit të librit të saj të fundit, ish-prokurorja zvicerane që mbikëqyri hetimet e krimeve të luftës në Ruandë, Siri dhe ish-Jugosllavi, tha se në Ukrainë po kryheshin krime lufte të qarta.
Ajo tha se ishte veçanërisht e tronditur nga përdorimi i varreve masive, të cilat siç tha i kujtojnë pjesën më të tmerrshme të luftrave në ish-Jugosllavi.
Ajo tha se krime të tjera lufte që po kryhen në Ukrainë janë sulmet ndaj civilëve, shkatërrimi i ndërtesave civile dhe madje edhe i qyteteve të tëra.
