ITALI – Policia italiane po kryen një operacion të madh në Milano këtë të hënë, me dhjetëra arrestime dhe kontrolle mes tifozëve ultras të klubeve të futbollit të Interit dhe Milanit, përfshirë drejtuesit e tyre, të dyshuar për “infiltrim kriminal”, me lidhje mafioze.
“Që në orët e para të mëngjesit të sotëm, ka nisur një operacion i gjerë i Policisë së Shtetit dhe Gardës së Financës, i koordinuar nga Drejtoria Antimafia e Prokurorisë së Milanos”,- thuhet në një deklaratë të përbashkët.
Të arrestuarit dyshohen për “krime të komplotit kriminal, me përkeqësim të metodës mafioze, përveç zhvatjes, plagosjes dhe krimeve të tjera të rënda”.
Në maksi-operacionin në Milano, “me fokus ‘direktivat’ e tifozëve të organizuar të dy skuadrave milaneze të futbollit”, agjentët kanë kryer edhe masa të tjera paraprake, urdhra kontrolli dhe kontrolle të shumta.
Mes të arrestuarve është një nga drejtuesit kryesorë ultras të Interit, Marco Ferdico, shumë i afërt me Antonio Bellocco, i cili u vra më 4 shtator nga Andrea Beretta, kreu i ‘ultrave’ të klubit.
Është arrestuar edhe Luca Lucci, kreu i ultrasve milanezë, tashmë i dënuar për drogë, përveç Christian Rosiello, truproja i reperit të njohur italian Fedez, sipas mediave lokale.
“Të dyshuarit janë pothuajse të gjithë të lidhur me tifozët ultra të dy skuadrave kryesore milaneze dhe krimet kanë të bëjnë me biznesin e futbollit”, sqarohet në shënim.
Janë 19 masa sigurie, 16 në burg dhe 3 arrest shtëpie
Operacioni i policisë vjen disa javë pas vrasjes së Bellocos, një prej figurave më të njohura të grupit radikal të Interit dhe i lidhur me ‘Ndrangheta’, mafian e fuqishme kalabreze, i goditur me thikë nga Beretta pasi u qëllua.
Tashmë atëherë dyshohej se lufta mes të dyve, fatale për Belloccon, mund të lidhej me një komplot shumë më të thellë biznesesh të paligjshme që Prokuroria e Milanos po heton tani.
