UKRAINË- Hetuesit ukrainas kanë zbuluar një “dhomë torture” të pretenduar në qytetin Kherson, ku dyshohet se dhjetëra burra u arrestuan, u goditën nga rryma, u rrahën dhe disa prej tyre u vranë. Policia tha se ushtarët rusë morën qendrën e paraburgimit të të miturve rreth mesit të marsit dhe e kthyen atë në një burg për burrat që refuzuan të bashkëpunonin me ta ose që akuzoheshin për veprimtari partizane.
Tre fqinjë me godinën dhe dy shitës lokalë thanë se filluan të dëgjonin britma rreth gjashtë javë pasi panë ushtarët rusë të pushtonin ndërtesën. Dëshmitarët thanë se filluan të shihnin njerëz duke u futur me kapuçë në kokë. Mykola Ivanovych, ballkoni i të cilit ka pamje nga oborri i pasëm i qendrës së paraburgimit, tha se pa dy trupa të hedhur në garazhet prapa qendrës.
“Ata dilnin të rrahur, plotësisht të çorientuar. Ata vinin këtu dhe kërkonin udhëzime dhe ne u jepnim para për autobusin,” tha Ira.
Dëshmitarët thanë se ata kurrë nuk i panë fytyrat e burrave në krye të qendrës, pasi ata mbanin kapuç dhe ishin të veshur kokë e këmbë me të zeza. Ushtarët rusë erdhën në shtëpinë e Vitaliy Serdiuk në moshë pensioni në fund të gushtit. Ata e kthyen vendin përmbys dhe qëlluan në ajër kur fqinjët protestuan, ata e çuan Serdiuk në qendrën e paraburgimit. Serdiuk u rrah aq keq brenda katër ditëve që u mbajt, sa gruaja e tij, Elena, tha se ai kishte frikë të dilte nga shtëpia për dy muajt e fundit. Ushtarët i kishin thënë se e rrahën pasi djali i tij ishte ushtar dhe luftonte kundër tyre.
Zhenia Dremo, specialiste e IT-së, u godit në ballë në një postbllok për shkak se nuk kishte cigare për t’u dhënë ushtarëve, duke i lënë një plagë ende të dukshme. Rusët më pas e çuan në qendrën e paraburgimit. Ajo tha se njerëzit në qeli ndryshoheshin vazhdimisht. Ai tha se kishte dëgjuar se kishte 23 qeli në total, duke sugjeruar se rreth 180 njerëz mund të ishin mbajtur atje në çdo kohë.
