Infektimit nga Covid-19, nuk i ka shpëtuar dot as vetë drejtori i përgjithshëm i QSUT-së, Enkelejd Joti, bëjnë me dije burime brenda këtij institucioni.
Derimë më tani gjendja e Jotit paraqitet e qendrueshme dhe mësohet se ai është duke u trajtuar me terapitë përkatëse në banesë dhe nuk është parë e nevojshme shtrimi në spital.
Ditën e sotme Komiteti Teknik i Ekspertëve, pas një mbledhje rekomandoi dhe u vendosën nga qeveria disa masa gjysmake për situatën teje të rënduar në vend, siç është shtrirja e ndalim qarkullimit nga ora 20.00 e mbrëmjes, ashpërsimi i gjobave dhe kthimi i një pjese të arsimit në online.
Masat e plota:
– Ndalimi i qarkullimit të lëvizjes për qytetarët nga ora 20:00 e mbrëmjes – 6:00 të mëngjesit, me përjashtim të emergjencave shëndetësore dhe për arsye pune (në këtë rast është e domosdoshme leja nëpërmjet aplikimit tek e-Albania) për një afat 14 ditor, duke filluar nga dita e enjte, datë 11 Shkurt – 25 Shkurt.
– Ndalimi i aktiviteteve të bareve, restoranteve, klubeve, nga ora 20:00 e mbrëmjes – 06:00 të mëngjesit (me përjashtim të shërbimit delivery), duke filluar nga dita e enjte, datë 11 Shkurt – 25 Shkurt.
– Nisur nga rritja e rasteve të infektimeve të reja në grupmoshën 15-24 vjeç, shkollat e mesme do të aplikojnë skenarin e tretë, pra atë online ne zonat e riskut të lartë, ku përfshihen bashkitë: Tiranë, Fier, Vlorë, Berat, Durrës, Gjirokastër, Lezhë, Lushnje, Pogradec dhe Kamëz, për periudhën 11 shkurt – 26 shkurt.
– Sezoni i provimeve për universitetin do të zgjatet, për të siguruar kombinimin e provimeve online dhe në auditor, për lëndët që kërkojnë prezencë, sipas vlerësimit të MASR, duke zbatuar rreptësisht protokollet AntiCovid.