Qeveria britanike pritet të japë ‘dritën jeshile’ për shitjen e Chelseat në orët e ardhshme, sipas BBC Sport.
Megjithatë, marrëveshja prej 4.25 miliardë dollarësh ” ka ende pengesa të mëdha për të kapërcyer “, sipas një burimi qeveritar të cituar nga rrjeti britanik.
Ish-pronari i Chelseat, Roman Abramovich , ka një pasaportë portugeze dhe prandaj blerja duhet të miratohet nga autoritetet portugeze.
Sipas BBC, ministrat britanik janë në “bisedime intensive” me homologët e tyre në Komisionin Evropian për t’u ofruar atyre garancitë që u nevojiten për të miratuar marrëveshjen.
Chelsea ka arritur një marrëveshje me një konsorcium të financuar privatisht të udhëhequr nga investitor amerikan Todd Boehly, bashkëpronar i ekipit të bejsbollit LA Dodgers.
Klubi u nxor në shitje përpara se pronari Abramovich të sanksionohej për lidhjet e tij të dyshuara me presidentin rus Vladimir Putin pas pushtimit të Ukrainës.
Qeveria më pas lëshoi një licencë speciale për Chelsean që të vazhdojë të funksionojë, e cila skadon më 31 maj.
Javën e kaluar BBC mësoi se qeveria britanike ishte e shqetësuar se marrëveshja mund të rrezikohej për shkak të mungesës së konsensusit me klubin mbi të ardhurat e çdo shitjeje.
Sidoqoftë, tani është mësuar se Abramovich ka dhënë garanci që një hua prej 1.6 miliardë funtesh nga shitja e klubit nuk do t’i shkojë oligarkut rus ose familjes së tij.
Kjo do të lejonte që paratë të futeshin në një llogari të ngrirë nën kontrollin e qeverisë britanike.
“Të gjithë duan të arrijnë marrëveshjen, por me natyrën e ndërlikuar të marrëveshjes dhe strukturat e pronësisë së Chelsea, asgjë nuk është e thjeshtë”, tha burimi i qeverisë britanike.
“Ne po punojmë shumë për të siguruar partnerët tanë ndërkombëtarë të cilët me të drejtë duan garancitë e tyre për këtë marrëveshje dhe natyrisht se si do të shpenzohen përfundimisht të ardhurat’.
“Koha po mbaron me shpejtësi, kjo marrëveshje duhet të përfundojë deri në fund të së martës, përndryshe afatet kryesore të futbollit mund të humbasin dhe klubi do të jetë në rrezik”.
Federata e Futbollit duhet të nominojë klubet për garat e UEFA-s deri në fillim të muajit të ardhshëm.
Premier League takohet më 9 qershor për të dhënë licencat për sezonin e ardhshëm.
