TURQI- Presidenti turk Rexhep Taip Erdogan ka nënshkruar dhe ka dorëzuar protokollin për anëtarësimin e Suedisë në NATO. Lajmi është njoftuar nga presidenca turke, ku ndër të tjera theksohet se protokolli për anëtarësimin e Suedisë në NATO u nënshkrua sot më 23 tetor 2023 nga presidenti dhe iu referua Asamblesë së Madhe Kombëtare të Turqisë.
“Protokolli i pranimit të Suedisë në NATO u nënshkrua më 23 tetor 2023 nga presidenti Recep Tayyip Erdogan dhe u dërgua në Asamblenë e Madhe Kombëtare”, thuhet në postimin e presidencës në platformën X.
Kujtohet se më 13 tetor, Sekretari i Përgjithshëm i NATO-s, Jens Stoltenberg, kishte deklaruar se Turqia i konfirmoi Aleancës së Atlantikut të Veriut angazhimin e saj për të ratifikuar pranimin e Suedisë në organizatën ndërkombëtare, siç parashikohej në një marrëveshje të lidhur në samitin e aleancës në Vilnius në korrik. Në takimin e ministrave të mbrojtjes të NATO-s të mbajtur më 11 dhe 12 tetor në Bruksel, u bë presion mbi Hungarinë dhe Turqinë për të ratifikuar anëtarësimin e Suedisë në aleancë sa më shpejt të jetë e mundur, tha një burim i AFP-së për informacionin.
