Gjithçka që dihet deri më tani për sulmin e së dielës, 14 dhjetor, me armë zjarri në Bondi Beach në Australi.
Autoritetet australiane kanë bërë publike detaje të reja lidhur me sulmin në Bondi Beach, i cili po trajtohet si një akt terrorist i motivuar nga ekstremizmi fetar.
Bilanci i viktimave dhe natyra e sulmit
Sulmi ndodhi gjatë një eventi të Hanukës, ku ishin mbledhur qindra persona. 15 njerëz u vranë dhe 27 të tjerë u plagosën, disa prej tyre rëndë. Mes viktimave janë një vajzë 10-vjeçare, një i mbijetuar i Holokaustit dhe dy rabinë (udhëheqës fetarë). Ngjarja konsiderohet si sulmi më vdekjeprurës me armë zjarri në Australi në dekada dhe kishte në shënjestër komunitetin hebre.
Autorët e sulmit
Autoritetet kanë konfirmuar se sulmi u krye nga dy persona, babë dhe bir. Babai, Sajid Akram (50 vjeç), u vra gjatë një shkëmbimi zjarri me policinë në vendngjarje. Djali i tij, Naveed Akram (24 vjeç), u plagos dhe ndodhet në spital në gjendje kritike, nën mbikëqyrjen e policisë.
Sulmi po trajtohet si akt terrorist
Qeveria australiane ka konfirmuar se sulmi po hetohet si terrorizëm. Kryeministri Anthony Albanese tha se autorët vepruan të vetëm, pa qenë pjesë e një rrjeti të organizuar, por ishin të motivuar nga ideologji ekstremiste. Hetuesit besojnë se të dy autorët kishin betuar besnikëri ndaj grupit ekstremist Shteti Islamik. Në makinën e tyre u gjetën dy flamuj të ISIS-it, si dhe mjete shpërthyese. Sipas autoriteteve, kjo përforcon motivin ideologjik të sulmit.
Naveed Akram kishte qenë në vëmendjen e agjencisë së inteligjencës ASIO që në vitin 2019 për shkak të lidhjeve me individë ekstremistë. Megjithatë, në atë kohë nuk ishte vlerësuar si kërcënim i drejtpërdrejtë.
Ai thuhet se kishte lidhje me Isaac El Matari, i dënuar për terrorizëm në Australi në vitin 2021.
Sajid Akram kishte ardhur në Australi në vitin 1998 me vizë studenti dhe më pas kishte marrë rezidencë të përhershme. Të dy jetonin në lagjen Bonnyrigg në jugperëndim të Sydney-t. Disa javë para sulmit, ata ishin zhvendosur në një Airbnb në Campsie, më afër Bondi Beach. Familjarë dhe persona të tjerë u morën në pyetje, por u liruan pa akuza.
Mënyra e sulmit
Autorët përdorën armë me tytë të gjatë, duke qëlluar nga një urë e vogël pranë plazhit. Policia sekuestroi gjashtë armë zjarri në vendngjarje. Të gjitha armët rezultuan të ishin të licencuara për 50 vjeçarin, i cili kishte leje për gjueti
Reagimi i komunitetit dhe institucioneve fetare
Instituti islam ku Naveed Akram kishte studiuar Kuranin reagoi duke dënuar ashpër sulmin.
Përfaqësuesit e tij theksuan se vrasja e civilëve është e ndaluar në Islam dhe se akti bie ndesh me mësimet themelore të fesë.
