Një incident me të shtëna me armë zjarri në një varkë me emigrantë të paligjshëm ka ndodhur mbrëmjen e së shtunës në lumin Evros, pranë Souflit.
Sipas informacioneve paraprake, mbrëmë një gomone me gjithsej 11 persona ka nisur të kalojë nga pala turke drejt asaj greke. Një patrullë greke e vendosur në zonë ka lokalizuar emigrantët e parregullt me një kamerë termike dhe ka tentuar t’i pengojë ata të kalojnë në anën greke duke përdorur sinjale drite dhe zanore.
Të shtëna janë qëlluar nga pala turke, ndoshta nga pjesëtarë të ushtrisë turke. Kur anija me emigrantët mbërriti në anën greke, u konstatua se në bord ndodheshin vetëm pesë persona, ndërsa një grua u gjet e vdekur në ujë.
Siç ka rezultuar, gruaja është qëlluar me një pistoletë e kalibrit 22, e cila nuk përdoret as nga pala greke dhe as turke dhe dyshohet se trafikanti mund ta ketë qëlluar atë ndoshta për shkak se ka protestuar ose ka rënë në ujë.
Pesë emigrantët e paligjshëm të gjetur në bord, të gjithë me origjinë afrikane, ndoshta etiopianë, janë transportuar në Aleksandropolis. Njëri prej tyre është i mitur. Ata i kishin paguar trafikantit 2000 euro secili, për të kaluar në Greqi.
