IZRAEL- Izraeli ka bllokuar hyrjen e të gjithë ndihmave humanitare në Gaza, pasi kërkon që Hamasi të pajtohet me një plan të SHBA-së për një zgjatje të armëpushimit. Faza e parë e armëpushimit përfundoi të shtunën. Zyra e kryeministrit izraelit Benjamin Netanyahu tha se Hamasi deri më tani kishte refuzuar të pranonte një zgjatje të përkohshme sipas një propozimi të të dërguarit të Donald Trump për Lindjen e Mesme, Steve Witkoff.
Një zëdhënës i Hamasit tha se bllokimi i furnizimeve për Gazën ishte “shantazh i lirë” dhe një “grusht shteti” në marrëveshjen e armëpushimit dhe u kërkoi ndërmjetësve të ndërhynin. Grupi palestinez dëshiron që faza e dytë e marrëveshjes të vazhdojë siç ishte negociuar fillimisht, me lirimin e pengjeve dhe të burgosurve palestinezë dhe tërheqjen e forcave izraelite nga Gaza. Hamasi deklaroi më parë se nuk do të binte dakord për ndonjë zgjatje të fazës së parë pa garanci nga ndërmjetësit e SHBA-së, Katarit dhe Egjiptit se faza e dytë do të ndodhte përfundimisht.
Një deklaratë nga zyra e Netanyahu tha: “Me përfundimin e fazës 1 të marrëveshjes së pengjeve dhe në dritën e refuzimit të Hamasit për të pranuar skicën e Witkoff për vazhdimin e bisedimeve – për të cilat Izraeli ra dakord – Kryeministri Netanyahu ka vendosur që që nga mëngjesi i sotëm, të gjitha hyrjet e mallrave dhe furnizimeve në Rripin e Gazës do të ndërpriten. Izraeli nuk do të lejojë një armëpushim pa lirimin e pengjeve tanë. Nëse Hamasi vazhdon refuzimin e tij, do të ketë pasoja të mëtejshme.”
Zëdhënësi i Hamasit tha: “Vendimi i Netanyahut për të ndaluar dërgimin e ndihmave në Gaza tregon edhe një herë fytyrën e shëmtuar të okupimit izraelit… Komuniteti ndërkombëtar duhet të ushtrojë presion mbi qeverinë izraelite për të ndaluar vdekjen e popullit tonë nga uria.”
Mbrëmjen e djeshme, zyra e Netanyahut tha se Izraeli kishte rënë dakord me një propozim të SHBA-së që armëpushimi të vazhdonte për rreth gjashtë javë gjatë periudhës së Ramazanit mysliman dhe të Pashkës hebreje. Nëse në fund të kësaj periudhe negociatat do të arrinin në një rrugë pa krye, Izraeli do të rezervonte të drejtën të kthehej në luftë, shkruan BBC.
Faza e parë e armëpushimit që hyri në fuqi më 19 janar dhe skadoi të shtunën, ndaloi 15 muaj luftime midis Hamasit dhe ushtrisë izraelite, duke lejuar lirimin e 33 pengjeve izraelite dhe pesë tajlandeze për rreth 1900 të burgosur dhe të paraburgosur palestinezë.
Por negociatat për fazën e dytë, duke përfshirë lirimin e të gjithë pengjeve të mbetura të gjallë dhe tërheqjen e trupave izraelite nga Gaza, mezi kanë filluar. Besohet se janë 24 pengje të gjallë, ndërsa 39 të tjerë supozohet të jenë të vdekur.
Hamasi kreu një sulm të paprecedentë ndaj Izraelit më 7 tetor 2023, duke vrarë rreth 1200 njerëz dhe duke marrë peng 251 të tjerë. Izraeli u përgjigj me një fushatë ajrore dhe tokësore në Rripin e Gazës, gjatë së cilës janë vrarë të paktën 48,365 njerëz, sipas ministrisë së shëndetësisë të territorit të drejtuar nga Hamasi.
