Ndërkohë që Barcelona është e fokusuar në përpjekjen për të ndryshuar situatën e vështirë në të cilën ndodhet, pa e siguruar ende një vend në edicionin e radhës të Champions League, në Australi rritet pritshmëria për të parë Barcelonën, e cila për herë të parë majin e ardhshëm do të vizitojë vendin e largët të ‘kangurëve’.
Në fakt, një muaj para se Barça të përballet me një ekip me lojtarët më të mirë në ligën australiane, në një miqësore që do të zhvillohet më 25 maj në stadiumin ‘Accor’ të Sydneyt, organizatorët e turneut kanë vendosur tashmë shitjen e biletave, ku interesi është shumë i madh.
Pa Messin, i cili ishte pretendimi i madh në turnetë e Barçës deri në verën e kaluar, fytyrat e dukshme për të promovuar ndeshjen në Australi janë ato të Aubameyang, Frenki de Jong dhe tre nga kapitenët e Barçës: Sergio Busquets, Gerard Pique dhe Jordi Alba.
Me kapacitetin prej 80.000 spektatorësh, stadiumi ‘Accor’ në Sydney pritet të jetë plot për të parë ndeshjen e parë në historinë e Barçës në kontinentin oqeanik.
