Ministri në dorëheqje i Punëve të Brendshme të Kosovës, Xhelal Sveçla, ka njoftuar se në një aksion të Policisë së Kosovës në veri të vendit janë zbuluar tre raketa hedhës krahu, dy helmeta balistike ushtarake, dy çanta ushtarake, një antiplumb dhe një gazmaskë.
Këtë ai e ka quajtur “terrorizëm i sponsorizuar nga Serbia”
“Në një aksion të radhës të Policisë së Kosovës janë zbuluar tre raketa hedhës krahu (zolla), dy helmeta balistike ushtarake, dy çanta ushtarake, një antiplumb dhe një gazmaskë.
Terrorizmi i sponsorizuar nga Serbia si në rastet si ky sot, nuk kanë dhe nuk do të kenë më vend në Kosovë.
Nuk do të ndalemi, në çdo cep të Republikës sonë” – shkruan Svelça.
Për këtë rast më herët raportoi mediumi në gjuhën serbe “KoSSev”, i cili raportoi se ngjarja ka ndodhur në një ndërtesë të njohur si Vampirusha në dalje të Mitrovicës së Veriut.
Kontrolli u krye në hyrjen e dytë të kësaj ndërtese..
Siç ka konfirmuar zëvendëskomandanti i Policisë së Kosovës për veri, Veton Elshani, i cili ndodhet në terren, në një banesë janë gjetur tri pushkë, helmeta, një maskë gazi, një jelek antiplumb dhe një çantë ushtarake.
Ai saktësoi se nuk ka të arrestua dhe se nuk dihet se për banesën e kujt bëhet fjalë.
