Me Kodin e ri të Autostradave, i cili tashmë ka marrë miratimin e Dhomës dhe po shqyrtohet nga Senati, qytetarët italianë duhet të mendohen dy herë para se të braktisin kafshët e tyre në rrugë.
Sipas mediave italiane, dispozita parashikon shtrëngim të gjobave, deri në heqjen e leje drejtimit, për ata që braktisin kafshën e tyre. Një masë që mbërrin pikërisht në një periudhë të vitit kur fenomeni po pëson rritje, me afrimin e pushimeve verore, shkruajnë mediat italiane.
Për momentin, neni 727 i Kodit Penal i dënon ata që braktisin kafshët me burgim deri në një vit ose me gjobë nga 1000 deri në 10 mijë euro. Ligji i ri parashikon se dënimi rritet me një të tretën nëse braktisja ndodh në rrugë: ekziston rreziku deri në 7 vjet burg.
Nëse pronari i kafshës ka përdorur mjetin për kryerjen e krimit, me konstatimin e shkeljes do të pezullohet lejedrejtimi nga 6 muaj në 1 vit. Jo vetëm kaq. Nëse kafsha e braktisur do të shkaktonte pa dashje një aksident rrugor, duke shkaktuar viktima ose lëndime, atëherë personi përgjegjës për braktisjen mund të ndiqet penalisht për aksidente rrugore ose lëndime të rënda.