DIBëR – Policia e Dibrës vuri në pranga dy të rinj pasi u kapën duke transportuar lëndë narkotike të llojit kokainë me makinën e tyre. Sipas informacioneve, të ndaluarit janë Besart Kamberi, 26 vjeç dhe Ernest Demiri, 24 vjeç. Dy të rinjtë kishin përgatitur sasinë e drogës në doza të vogla duke e vendosur në makinën e tyre tip “Fiat”. Efektivët e sektorit të antidrogës në Dibër kishin marrë informacione paraprake Kamberin dhe Demirin.
NJOFTIMI I POLICISË SË DIBRËS:
Goditet një tjetër rast i shpërndarjes së drogave të forta në doza.
Vihen në pranga dy shtetas.
Në vijim të punës për parandalimin, evidentimin dhe goditjen e veprimtarisë kriminale në fushën e narkotikëve, në bazë dhe të informacioneve të marra në rrugë policore se dy shtetas që qarkullojnë me një automjet tip ‘Fiat’, shpërndajnë lëndë narkotike, forcat e Posaçme “Shqiponja”, në bashkëpunim me Seksionin për Hetimin e Narkotikëve kanë bërë të mundur lokalizimin dhe ndalimin e mjetit të dyshuar, me të cilin udhëtonin dy shtetas.
Gjatë kontrollit të ushtruar në automjet u gjet një sasi lëndë narkotike kokainë e ndarë në doza gati për shitje, të cilat u sekuestruan në cilësinë e provës materiale së bashku me automjetin.
Në përfundim të veprimeve, specialistët e Seksionit për Hetimin e Narkotikëve në DVP Dibër, bënë arrestimin në flagrancë të shtetasve B. K., 26 vjeç, dhe E. D., 24 vjeç, banues në Peshkopi.
Materialet i kaluan Prokurorisë pranë Gjykatës së Shkallës së Parë Dibër për veprën penale “Prodhimi dhe shitja e narkotikëve”.
