Dhjetëra qytetarë, të cilët dëshirojnë të udhëtojnë drejt Kosovës, janë kthyer mbrapsh nga doganierët në pikat e kalimit kufitar me Kosovën.
Kjo ka shkaktuar indinjatë në radhët e qytetarëve, të cilët ishin nisur për të shkuar në Kosovë, por që nuk janë lejuar. Sipas tyre, ata nuk janë lejuar të hynë në territorin kosovar, edhe pse janë të vaksinuar me dy doza, ndërsa shtojnë se përveç certifikatës së vaksinimit, u kanë kërkuar edhe një test PCR, ose që të ishin vaksinuar tre herë.
“I kemi bërë vaksinat por jemi të detyruar të bëjmë edhe testin. Ky është skandal , të duash të hysh në tokën tënde dhe të paguash 30 euro. Ne kërkojmë çfarë të jetë, por këta bëjnë çfarë duan vetë. Është bërë ky i jonë këtej dhe ky tjetri këtej e bëjnë si të duan”– u shpreh një prej qytetarëve të kthyer në pikën kufitare me Kosovën për Fax News.
Qeveria e Kosovës ka vendosur të ashpërsojë masat anti-COVID si pasojë e rritjes së rasteve me koronavirus gjatë ditëve të fundit, pas shfaqjes së variantit Omicron. Këto masa hynë në fuqi nga dita e djeshme dhe do të jenë të vlefshme deri më 4 shkurt. Sipas njoftimit të Zyrës së Kryeministrit, masat e reja përfshijnë kufizim të lëvizjes (prej orës 22:00 deri në orën 05:00), kufizim të orarit të punës për gastronominë (lejohet puna vetëm deri në orën 21:00), si dhe ashpërsim të rregullave për hyrje në vend.
