Kolegji Zgjedhor ka gjobitur me 50 mijë lekë Selami Jenishehrin, kreun e Partisë Bashkimi Popullor i Pensionistëve Shqiptar, për ankim abuziv.
Jenishehri ishte në koalicion me PD, por vendosi të largohej duke i dërguar një letër “për dijeni” KQZ-së. Megjithatë, mbetet e paqartë se për çfarë është ankuar ai më pas.
Sot, më datë 03.04.2025, ora 15:30, Kolegji Zgjedhor Gjyqësor, mori në shqyrtim në seancë gjyqësore, zhvilluar në ambientet e Gjykatës Administrative të Apelit1 , Ankimin Nr.3 Regj. Themeltar Dt.12.03.2025 Regjistrimi, me
ANKUESE: P.B.P.P.SH (Partia Bashkimi Popullor i Pensionistëve Shqiptarë), përfaqësuar nga Z.Selami Jenishehri.
PERSON I INTERESUAR: Komisioni Qendror i Zgjedhjeve, përfaqësuar nga Znj.Juneta Dumi.
OBJEKTI: Kërkojmë nga Kolegji Zgjedhor të Gjykatës së Apelit Tiranë, të detyrojë Komisionin Qendror të Zgjedhjeve (KQZ) të marrë vendim për ankimin e depozituar në K.Q.Z me dt. 14.06.2021, ora 15:10 minuta, shiko bashkangjitur me të, dy dokumenta me tre faqe, afat i shqyrtimit të këtij ankimimi, sipas nenit 152 të Kodit Zgjedhor, vazhdon deri në përfundim të shqyrtimeve administrative të ankimimeve, të cilat akoma nuk kanë përfunduar.
BAZA LIGJORE: Neni 152 i Kodit Zgjedhor. Çështja u shqyrtua në trup gjykues të përbërë nga gjyqtarët: 1. Artan Çupi (Relator); 2. Lutfie Celami (Anëtare); 3. Entela Shedula (Anëtare); 4. Ornela Naqellari (Anëtare); 5. Rexhep Bekteshi (Anëtar). Kolegjit Zgjedhor Gjyqësor, me Vendimin Nr.5 Dt.03.04.2025, unanimisht:
VENDOSI
1.Pushimin e gjykimit të çështjes civile me nr. 3 regj. themeltar datë 12.03.2025 regjistrimi. 2. Gjobitjen e ankuesit Partia Bashkimi Popullor i Pensionistëve Shqiptarë me 50.000 lekë për paraqitje të ankimit abuziv. 3. Ky vendim është i formës së prerë dhe ndaj tij nuk lejohet ankim. 4. Kundër vendimit për gjobitje të ankuesit lejohet ankim i veçantë pranë të njëjtës trupë gjykuese. Tiranë, më 03.04.2025
