Lufta në Ukrainë hyn sot në ditën e saj të 58-të. Udhëheqësi i Çeçenisë, Ramzan Kadyrov, njofton se Rusia ka marrë kontrollin e godinës administrative të uzinës së çelikut Azovstal dhe territorin ngjitur, raporton Tgcom24.
Sot vazhdon evakuimi i civilëve nga Mariupoli. Qytetarët nxirren jashtë nga banesat mirëpo ka ende njerëz të moshuar në bodrume, shumë prej të cilëve nuk mund të lëvizin vetë.
Sipas Shteteve të Bashkuara, forcat e Moskës “nuk kanë bërë ndonjë përparim të rëndësishëm në Donbass”. Zelenskyy raporton se Kremlini e ka refuzuar propozimin për një armëpushim për Pashkët Ortodokse. Një sulm me raketa ruse goditi dhe “shkatërroi plotësisht” rrjetin hekurudhor të Dnipro. Sipas kryeministrit ukrainas, rindërtimi i vendit do të kushtojë të paktën 600 miliardë dollarë. Për Joe Biden, beteja e Kievit ishte “një fitore historike për Ukrainën”.
Organizata e Shteteve Amerikane (OAS), forumi më i vjetër në botë për diplomacinë rajonale, ka pezulluar pjesëmarrjen e Rusisë si vëzhguese e përhershme në institucion deri në “përfundimin e armiqësive të saj”.
