Presidenti i Ukrainës, Volodymyr Zelensky, ka mbërritur sot në Tiranë për të marrë pjesë në Samitin e gjashtë të Komunitetit Politik Europian, që po mbahet për herë të parë në Ballkanin Perëndimor. Në hyrje të samitit, Zelensky u prit me përzemërsi nga Kryeministri Edi Rama, me të cilin pati një moment të ngrohtë përshëndetjeje.
Nën moton “A New Europe in a New World”, samiti i zhvilluar në kryeqytetin shqiptar ka mbledhur mbi 47 liderë shtetesh dhe qeverish nga e gjithë Evropa, së bashku me drejtues të lartë të institucioneve europiane dhe ndërkombëtare.
Mikpritësi i këtij samiti, Kryeministri Edi Rama, pritet të zhvillojë gjatë ditës një sërë takimesh dypalëshe me personalitetet pjesëmarrëse, duke nisur me Sekretarin e Përgjithshëm të NATO-s, Mark Rutte, e më pas me Kryeministrin e Spanjës Pedro Sanchez, Presidenten e Komisionit Evropian Ursula von der Leyen, Princin Sovran të Monakos Albert II, Kancelarin e Austrisë Christian Stocker, Presidentin e Turqisë Recep Tayyip Erdoğan, Kryeministren e Italisë Giorgia Meloni, Presidentin e Qipros Nikos Christodoulides, Kryeministrin e Hollandës Dick Schoof dhe Kryeministrin e Belgjikës Bart De Wever.
Në agjendën e ditës përfshihet ceremonia zyrtare e mirëseardhjes, një foto familjare me të gjithë liderët pjesëmarrës, si dhe një sërë aktivitetesh kulturore që promovojnë traditën shqiptare përmes performancave artistike.
Samiti do të vijojë me seanca plenare dhe tryeza diskutimi, ku fokusi do të jetë mbi sigurinë, paqen, stabilitetin rajonal dhe perspektivën europiane të Ballkanit Perëndimor në një kontekst të ri gjeopolitik.
