Ndodhin kaq shumë gjëra në vendin tim, në vendin tonë, çdo ditë, sa ndonjëhere vras mendjen a ja vlen të habitesh më apo të pyesësh “pse”. E keni parasysh, nga ato gjërat që ndoshta në një vend tjetër, vend normal, nuk kuptohen dot. Pikërisht nga ato gjërat që nxisin fantazinë e gazetarëve të portaleve të shkruajnë tituj që nisin me: Bombastike, Fantastike, Magjike, Tragjikomike dhe që përfundojnë si ushqim për bisedat e rëndomta të kafeneve, nga të cilat e vetmja gjë që nuk përhapet është virusi.
Për shembull, desha të shkruaja një gjë për fushatat zgjedhore të këtij viti, si PS-ja e ka bazuar të gjithën te shtëpitë e rindërtuara me lekë borxh nga tërmeti dhe 300 vaksinat që ka siguruar, ndërsa PD-ja te Instagrami i bashkëshortes së Bashës. Por po e le fare më mirë…
Pastaj desha të shkruaja edhe një gjë për këtë vaksinimin e personaliteteve, jo pse u bë, por mënyrën si e tha kryeministri jonë a ka gjysëm-Zoti, gjysëm-shkencëtari, gjysëm adm-ja i faqes së meme-ve më të madhe në Shqipëri. Po s’ja vlen, po e le fare…
E mira do ishte të kisha shkruar një gjë edhe për faktin që në një pandemi që duket se nuk po mbaron kurrë, shqiptarët e thjeshtë, politika dhe sistemi i drejtësisë kanë zgjedhur t’i bien atyre që kemi si “ujët e pakët”, doktorëve. Megjithatë varja, po e le fare…
Meqë jemi te doktorët, mendova të shkruaja diçka për Prof.Piperon, në lidhje me sugjerimet e tij për të mbyllur për një farë kohe shkollat dhe baret të gjjtha, po pastaj u kujtova që sapo ka kaluar koronavirusin (fatmirësisht jo rëndë) dhe e lashë fare, se mendimet e tij nuk duhet të jenë shumë të kthjellta për momentin…
Ah po, doja të shkruaja një gjë për Melisën e “Për’puthen” se kishte bërë këngë. Gjithsesi pastaj e lashë se jo vetëm që nuk kam fjalë për të, po realisht nuk i plas tr*pi njeriu. Shumë realisht.
Në një moment thashë të shkruaja ndonjë rresht në lidhje me showbiz-in. Gjithsesi e lashë, se të njejtat gjëra do ndodhin edhe javën tjetër, vetëm ndryshojnë personazhet, kështu që ç’e deshëm…
Ore mund të shkruaja edhe ndonjë analizë ekonomiko-politike, si tashmë qendra e botës është bërë boshti Pekin-Moskë dhe Perëndimit po i fut “ujë varka”, sidomos në këto kohë kovidiane. Po e lashë edhe këtë se thashë kush rri duron komentet “njerëzit janë me listë te dyqanet, ti flet për qendrën e botës”.
S’do ishte keq të shkruaja ndonjë gjë edhe për faktin që NASA ka çuar një robot në Mars, hapi i radhës para se të nisin nje mision me njerëz atje, por mendova ta le derisa në Vlorë të ketë ujë 24 orë, kështu që edhe për 4 vite nuk do flasim për hapsirën.
E di çfarë? Më mirë po e le fare, edhe pse do doja të kisha shkruar ndonjë gjë.