GJERMANI- Qytetarët dhe kompanitë në Gjermani duhet të përgatiten për çmime të larta të energjisë në terma afatgjatë, paralajmëroi të hënën ministri i Ekonomisë Robert Habek.
“Do të duhet të vazhdojmë të presim çmime të larta. Është një e vërtetë e hidhur dhe e vështirë”, tha Habek në Berlin, duke theksuar se shteti nuk mund të absorbojë plotësisht rritjen e çmimeve të energjisë, as për kompanitë dhe as për konsumatorët.
Qeveria ka bashkuar disa programe ndihme për të siguruar likuiditet dhe për të mbajtur furnizuesit e energjisë në treg, kujtoi Habek.
“Por dhe unë nuk mund t’i kursej askujt këto mesazhe të vështira, ata nuk mund të ndalojnë transferimin e çmimeve tek konsumatorët,” tha Habek pas një takimi me shoqatat e SME-ve.
Shumica e kompanive kanë lidhur kontrata afatgjata furnizimi me furnitorët, me çmime fikse, tha ai. Kjo do të thotë se shumë kompani nuk do t’i ndjejnë pasojat deri në vitin 2023, kur çmimet e disa produkteve do të rriten edhe më shumë. Paketa e ndihmës e qeverisë gjermane përfshin një program kredie nga banka shtetërore e zhvillimit KfW dhe subvencione të kostos së energjisë për kompanitë.
Megjithatë, subvencionet e drejtpërdrejta lidhen me kushte shumë strikte, vuri në dukje Habek, duke shtuar se sipas vlerësimit të ministrisë së tij, rreth 4,000 kompani duhet të kualifikohen për mbështetje, vetëm një pjesë e numrit të përgjithshëm të kompanive në Gjermani.
Ekonomia aktualisht është nën presion të madh, theksoi ministri gjerman, përveç turbullirave në tregjet e energjisë, është e qartë se ka mungesë të punëtorëve. Zinxhirët e furnizimit janë bërë gjithashtu të brishtë për shkak të luftës në Ukrainë dhe pandemisë së koronavirusit, vuri në dukje ai.
