Edhe pse ndodhet në një karrige me rrota si pasojë e sëmundjes së sklerozës multiple, sot Vjollca Koko është mjeke reumatologe në spitalin e Gjirokastrës, por gjithashtu kryetare e Shoqatës së Invalidëve Para dhe Tetraplegjikë në këtë qytet. Në një lidhje me Skype mjekja rrëfeu përballjen me këtë sëmundje dhe peripecitë që i është dashur të kalojë.
“Unë kam filluar që kur isha në gjimnaz, por atë që mësova të vërtetën rreth sëmundjes time e mësova kur isha në fakultetit e mjekësisë. Ishte një shenjë më tepër si thashethem, e mësova si emër sëmundjen por s’e dija që ishte me kaq ecuri të rëndë, do të prishte të ardhmen time.
Mendoja se ishte kalimtare, do të merrja mjekimin, dhe në vit të dytë apo të tretë e mësova prej shoqeve të mia, dhe ishte në vitin e pestë kur mësova për sëmundjen time dhe pashë aty që nuk ishte dhe aq e frikshme sa m’u bë nëpërmjet njohjeve. Ishte më e frikshme kur nuk kisha njohuri për të.”, u shpreh Koko.
Koko ia ka dalë dhe të ngrejë zërin, të kërkojë të drejtat e personave me aftësi të kufizuara, por shtoi se kjo kategori përballet ende me shumë sfida. Ajo thotë se personat me aftësi të kufizuara kanë nevojë për më shumë mbështetje psikologjie dhe për më shumë edukim dhe menaxhim të sëmundjeve në komunitet.
“Jam e pavarur por që të lëvizësh në rrugët e qytetit është e pamundur, duhet të të shtyjë dikush sepse nuk janë të përshtatura rrugët me standarde siç i përshkruajnë prandaj me shoqatën tonë kemi bërë shumë veprimtari, tryeza, emisione televizive dhe kërkesa me shkrim për respektimin e këtij legjislacioni që na siguron jo vetëm akses por dhe shërbime komunitare. Legjilacioni jonë po pasurohet por nuk po ecet paralelisht të paktën në komunitetin ku jam unë.”, u shpreh më tej mjekja.
